سکھر: آج دنیا بھر کے مسلمان جن مسائل کا شکار ہیں اس کی بنیادی وجہ دین سے دوری ہے

سکھر(رپورٹر) آج دنیا بھر کے مسلمان جن مسائل کا شکار ہیں اس کی بنیادی وجہ دین سے دوری ہے اگر مسلمان خدا کی رسی کو مضبوطی سے تھامیں تو وہ ایک بارپھر پوری دنیا پر غلبہ پاسکتے ہیں ان خیالات کا اظہار مولانا محمد ابراہیم میکو، مولانا عبدالقیوم نون، مولانا احسان اللہ عباسی، مولانا امداد اللہ، قاری مسرور لانگو، مولانا حق نواز بروہی و دیگر علماء کرام نے جامع مسجد طوبیٰ مدرسہ محمودیہ بروہی محلہ قریشی گوٹھ نیو تعلقہ سکھر میں زیرسرپرستی مولانا غلام اللہ بروہی کے منعقد جلسہ سیرت النبیﷺ سے خطاب کرتے ہوئے کیا جلسے میں نامور علماء کرام و رہنماﺅں غلام محی الدین قریشی سمیت اہل علاقہ و معزز شہریوں کی کثیر تعداد نے شرکت کی، جلسہ سیرت النبیﷺ سے خطاب کرتے ہوئے مذکورہ علماء کرام کا کہنا تھا کہ تمام مشکلات کا حل دین اسلام ہے، آقائے دو جہاں حضور اکرم ﷺ اللہ کی چاہت ہے، حضور اکرم ﷺ کی تعلیمات پرعمل پیرا ہو کر ہم اپنی زندگی اور آخرت سنوار سکتے ہیں، دین اسلام کا پیغام ہے کہ نفرتوں اور عداوتوں کاخاتمہ کریں، حضور اکرم ﷺ کی آمد سے اندھیرے میں ڈوبی ہوئی دنیا کو روشنی ملی، جہالت کا خاتمہ ہوا، ہمیں اپنا محاسبہ کرتے ہوئے اچھی عادات مثالی اخلاق کو شعار بنانا چاہئے علماء کرام کا کہنا تھاکہ حضور کی ولادت رب کی عطا کردہ نعمتوں میں سے سب سے عظیم اوربڑی نعمت ہے جس پر اس کا جتنا شکر کیا جائے کم ہے۔